Job Description

Skóla- og frístundasvið Reykjavíkurborgar auglýsir stöðu leikskólastjóra í leikskólanum Seljakot lausa til umsóknar. Leitað er að einstaklingi sem býr yfir leiðtogahæfileikum og er tilbúinn til að leiða áfram gott og metnaðarfullt leikskólastarf.

Seljakot er fimm deilda leikskóli með 84 börnum. Leikskólinn stendur við Rangársel í Breiðholti. Gott útivistarsvæði er í nágrenni leikskólans.

Áhersluþættir leikskólans eru frumkvæði, sköpun og tjáning.

Í leikskólanum er lögð áhersla á leik, sköpun, sjálfstæði og eru börnin hvött til að hafa áhrif á eigið nám og umhverfi. Leikurinn er í forgrunni og börnin fá tíma og rými til að kanna, skapa og læra á eigin forsendum.

Námskrá leikskólans byggir á Aðalnámskrá leikskóla og Menntastefnu Reykjavíkurborgar. Markmiðið er að skapa öruggt og hvetjandi námsumhverfi þar sem styrkleikar, áhugi og rödd hvers barns fá að njóta sín.

Í Seljakoti er lifandi og skapandi samfélag þar sem jákvæð samskipti, gleði og traust einkenna daglegt starf.

Helstu verkefni og ábyrgð

• Vera faglegur leiðtogi leikskólans og móta framtíðarstefnu hans innan ramma laga, reglugerða,aðalnámskrár og stefnu Reykjavíkurborgar.
• Stýra rekstri og daglegri starfsemi skólans, þar á meðal fjárreiðum, áætlanagerð og eftirfylgni.
• Standa vörð um farsæld, velferð og nám barna skólans.
• Hafa yfirumsjón með innra mati á starfi leikskólans og umbótaáætlunum.
• Hvetja til þróunar og nýbreytni í leikskólastarfi.
• Bera ábyrgð á starfsmannamálum, svo sem ráðningum, vinnutilhögun og starfsþróun.
• Tryggja virkt og farsælt samstarf við foreldra, foreldrafélög, skólaþjónustu og aðra ytri hagaðila sem deila ábyrgð á velferð barna.

Í öllu starfi skóla- og frístundasviðs er unnið að innleiðingu Menntastefnu Reykjavíkur, Látum draumana rætast, þar sem leiðarljósin eru virkni og þátttaka barna, aukið samstarf og fagmennska.

Hæfniskröfur

• Leyfisbréf
• Leikskólakennaramenntun er æskileg
• Framhaldsnám og reynsla af stjórnun í leikskóla æskileg
• Kennslureynsla á leikskólastigi
• Stjórnunar- og leiðtogahæfileikar
• Þekking á rekstri, áætlanagerð og fjármálastjórnun
• Lipurð og hæfni í samskiptum
• Faglegur metnaður, sjálfstæði og frumkvæði
• Áhugi og/eða reynsla af að leiða þróunarstarf
• Íslenskukunnátta C1 samkvæmt evrópska tungumálarammanum
• Hreint sakavottorð í samræmi við lög sem og reglur Reykjavíkurborgar

Nánari upplýsingar

Umsókn fylgi yfirlit yfir nám og fyrri störf, afrit af leyfisbréfi til að nota starfsheitið kennari og kynningarbréf þar sem fram koma helstu ástæður þess að sótt er um starfið.

Á grundvelli samþykktar fyrir skóla- og frístundaráð ræður sviðsstjóri í starf leikskóla og um kjör fer samkvæmt kjarasamningi Kennarasambands Íslands vegna Félags stjórnenda leikskóla.

Um er að ræða 100% stöðu sem er laus frá 1. desember 2026

Nánari upplýsingar um starfið veitir Elísabet Helga Pálmadóttir, deildarstjóri á skrifstofu leikskólamála skóla- og frístundasviðs, á netfanginu elisabet.h.palmadottir@reykjavik.is eða í síma 6939802.

Vakin er athygli á stefnu Reykjavíkurborgar um jafnan hlut kynja í störfum og að vinnustaðir endurspegli það margbreytilega samfélag sem borgin er.