Job Description

Háskólinn í Reykjavík auglýsir lausa stöðu doktorsnema við lagadeild í tengslum við samnorrænt og evrópskt verkefni um gervigreind. Leitað er að metnaðarfullum lögfræðingi sem hefur áhuga á að setja mark sitt á sívaxandi réttarsvið sem er í örri þróun og taka þátt í þverfaglegu samstarfi sem miðar að samfélagslegum ávinningi.

Um stöðuna:

Staðan er hluti af AI Antenna rannsóknarverkefninu sem Háskólinn í Reykjavík á aðild að. Doktorsneminn mun sinna rannsókn sem er hluti af verkefninu og miðar að því að kortleggja og greina áhrif evrópsk regluverks um gervigreind á íslenskan rétt með áherslu á persónuvernd, gagnaöryggi og heilbrigðisrétt.

Rannsóknin verður unnin í nánum tengslum við fræðimenn á öðrum fræðasviðum, sérstaklega tölvunarfræði og stafrænni heilbrigðistækni.

Gert er ráð fyrir að rannsóknin verði unnin og skilað á þremur árum í samræmi við viðmið Háskólans í Reykjavík um doktorsnám.

Helstu verkefni:

• Rannsaka evrópskar reglur og stefnumótun á sviði gervigreindar, þá sérstaklega AI Act og skylt regluverk um stafræna innri markaðinn.
• Skoða áhrif þessara reglna á íslensk lög og réttarframkvæmd, þ.m.t. aðrar alþjóðlegar skuldbindingar og mannréttindasamninga. Sjónum verður beitt að ákveðnum réttarsviðum jafnframt, t.a.m. á sviði heilbrigðisvísinda.
• Aðstoða við undirbúning og framkvæmd viðburða og verkefna á málefnasviðinu á vegum Háskólans í Reykjavík.
• Taka virkan þátt í rannsókna- og fræðasamfélagi Háskólans í Reykjavík.
• Vinna og ljúka doktorsverkefni innan tilskilins tímaramma í samræmi við viðmið Háskólans í Reykjavík.

Hæfiskröfur:

Nauðsynlegt er að uppfylla eftirfarandi hæfiskröfur:

• Meistaragráða í lögfræði (ML, Mag.Jur, Cand.Jur)
• Frumkvæði og sjálfstæði í vinnubrögðum.
• Hæfni til að vinna sjálfstætt og í hóp.
• Mikil færni í að vinna á bæði ensku og íslensku.
• Faglegur áhugi á samspili tækni og laga.

Æskilegt er að uppfylla eftirfarandi hæfiskröfur:

• Starfsreynsla sem nýtist við rannsóknarvinnu á sviði tækniréttar.

Umsóknarferli:

Umsókn skal fylgja kynningarbréf, ferilsskrá og ritaskrá eða ritdæmi frá umsækjanda. Þá skal í rannsóknartillögu sem fylgir umsókninni koma fram fagleg sýn umsækjanda á þróun og inntak evrópsks regluverks um gervigreind auk draga að rannsóknaráætlun sem tekur mið af almennt fyrirliggjandi upplýsingum um AI Atenna verkefnið.

Í umsóknarferlinu munu umsækjendur undirgangast próf og fara í viðtal. Ákvörðun um stöðuna verður tekin á grundvelli heildarmats allra umsóknargagna.

Tekið verður við umsóknum þar til staðan hefur verið fyllt og farið verður yfir umsóknin þegar þær berast.

Nánari upplýsingar:

Nánari upplýsingar veita leiðbeinendur verkefnisins í lagadeild Háskólans í Reykjavík: Dr. Gunnar Þór Pétursson deildarforseti (gunnarthor@ru.is) og Dr. María Rún Bjarnadóttir (mariarb@ru.is)

Háskólinn í Reykjavík hefur haslað sér völl sem öflugur rannsóknaháskóli á alþjóðavísu. Háskólinn stenst samanburð við erlenda háskóla í fremstu röð og fræðafólk skólans hefur náð framúrskarandi árangri. Kennsla og rannsóknir við Háskólann í Reykjavík mótast af sterkum tengslum við atvinnulíf og samfélag. Lögð er áhersla á þverfaglegt samstarf, alþjóðlegt umhverfi, nýsköpun og góða þjónustu.

HR er eftirsóknarverður vinnustaður og þar er lögð áhersla á fyrsta flokks aðstöðu í nærandi umhverfi, persónuleg samskipti, framsæknar kennsluaðferðir og nútímalega starfshætti. HR fagnar fjölbreytileika og mikið er lagt upp úr jafnrétti og virðingu fyrir einstaklingum og störfum þeirra. Nemendur Háskólans í Reykjavík eru um 3.600 í sjö deildum og starfsfólk er um 330 talsins, auk 350 stundakennara.